அயர்லாந்து அணிக்கெதிரான முதல் ஒருநாள் போட்டியில் ஐக்கிய அமீரக அணி வெற்றி..!

அயர்லாந்து அணிக்கெதிரான முதலாவது ஒருநாள் போட்டியில், ஐக்கிய அமீரக அணி 6 விக்கெட்டுகளால் சிறப்பான வெற்றியை பதிவுசெய்துள்ளது.

இந்த வெற்றியின் மூலம் நான்கு போட்டிகள் கொண்ட ஒருநாள் தொடரில், 1-0 என்ற கணக்கில் ஐக்கிய அமீரக அணி முன்னிலைப் பெற்றுள்ளது.

அபுதாபியில் நேற்று (வெள்ளிக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற அயர்லாந்து அணி முதலில் துடுப்பெடுத்தாட தீர்மானித்தது.

இதன்படி முதலில் துடுப்பெடுத்தாடிய அயர்லாந்து அணி நிர்ணயிக்கப்பட்ட 50 ஓவர்கள் நிறைவில் 5 விக்கெட்டுகள் இழப்புக்கு 269 ஓட்டங்களை பெற்றுள்ளது.

இதில் அணியின் அதிகப்பட்ச ஓட்டங்களாக, போல் ஸ்டெயர்லிங் ஆட்டமிழக்காது 131 ஓட்டங்களையும் என்டி பால்பிரையன் 53 ஓட்டங்களையும் பெற்றுக்கொண்டனர்.

ஐக்கிய அமீரக அணியின் பந்துவீச்சில், முஸ்தபா 2 விக்கெட்டுகளையும் காசீப் டவுட், அஹமட் ராஸா, பழனியப்பன் மெய்யப்பன் ஒரு விக்கெட்டினையும் வீழ்த்தினர்.

இதனைத்தொடர்ந்து 270 என்ற வெற்றி இலக்கை நோக்கி பதிலுக்கு களமிறங்கிய ஐக்கிய அமீரக அணி, 49 ஓவர்கள் நிறைவில் 4 விக்கெட்டுகள் இழப்புக்கு வெற்றி இலக்கை கடந்தது. இதனால் ஐக்கிய அமீரக அணி 6 விக்கெட்டுகளால் வெற்றிபெற்றது.

இதன்போது அணியின் அதிகப்பட்ச ஓட்டங்களாக, சுந்தங்கபாயில் ரிஸ்வான் 109 ஓட்டங்களையும் முஹமத் உஸ்மான ஆட்டமிழக்காது 102 ஓட்டங்களையும் பெற்றுக்கொண்டனர்.

அயர்லாந்து அணியின் பந்துவீச்சில், பெர்ரி மெக்கார்தி மற்றும் கர்டிஸ் கெம்பர் ஆகியோர் தலா 2 விக்கெட்டுகளை வீழ்த்தினர்.

இப்போட்டியின் ஆட்டநாயகனாக, 136 பந்துகளில் 1 சிக்ஸர் 9 பவுண்ரிகள் அடங்களாக 109 ஓட்டங்களை பெற்றுக்கொண்ட சுந்தங்கபாயில் ரிஸ்வான் தெரிவுசெய்யப்பட்டார்.

இந்த தொடரின் இரண்டாவது ஒருநாள் போட்டி, நாளை அபுதாபி மைதானத்தில் நடைபெறவுள்ளது.

Related posts